Siglir tar il cuntegn

Header

audio
Cor masdo Puntraschigna festivescha 60 onns
Or da Actualitad dals 24.04.2023. Maletg: RTR
laschar ir. Durada: 5 minutas 17 Secundas.
cuntegn

Puntraschigna 60 onns «Cor masdo» – 20 onns cumissiun da cultura

Cun ina festa dad in di entir èn quests giubileums vegnids festivads.

Vairamain èsi stà in concert annual. Il concert annual dal «Cor masdo» da Puntraschigna. Il rom era dentant spezial. Il giubileum da 60 onns n'ha il chor numnadamain betg festivà cun in concert da giubileum ordinari mabain cun in di da festa. In di cun concert dal chor, mabain era cun Flurin Caviezel, in program per uffants e concerts da Curdin Nicolay ed il quartet da trumbettas Motre.

L'emprim il giavisch – suenter il giubileum

Da metter en pe ina festa gronda, quest giavisch era sin maisa dapi stgars dus onns. Damai avant ch'il chor ha realisà ch'el po festivar l'onn 2023 ses giubileum da 60 onns.

Ils davos 2-3 onns n'avain betg propi gì la pussaivladad da far ina festa. La festa da la chanzun rumantscha la stad passada ha lura mussà quant ferm che quai ha manchà. Perquai avain nus tschertgà in motiv per far ina festa.
Autur: Patrick Würms Dirigent «Cor masdo» Puntraschigna

Ils 60 onns dal Cor masdo ensemen cun ils 20 onns da la cumissiun da cultura sajan lura stads dus bels motivs da metter en pe in di da festa. In di da festa cun in program vast enramà culinaricamain cun in brunch, e pli tard schuppa e turta. Per Patrick Würms, che dirigia il chor e fa era part da la cumissiun da cultura, è l'idea ida si. Radund 150 persunas èn vegnidas al di da festa.

In chor unì

Il giubileum da 60 onns pudess esser il medem mument il cumenzament per insatge nov per il Cor masdo da Puntraschigna. Dapi l'atun chanta il chor numnadamain ensemen cun il «Cor mixt» da Samedan. Entant che Puntraschigna aveva mo pli paucas chantaduras era Samedan en tschertga d'in dirigent. Sche questa collavuraziun resulta en ina fusiun dals dus chors, na saja anc betg vegnì discutà, ha il president dal Cor masdo Puntraschigna ditg. Da chantar en in chor da radund 50 chantaduras e chantadurs fetschia però gust, da quai èn tuts perencletgs.

RTR actualitad 08:00

Artitgels legids il pli savens