Resultats da las controllas precedentas
La vischnanca da Puntraschigna aveva fatg ina controlla cumplessiva da l'utilisaziun da las abitaziuns principalas durant l'onn passà. En quest rom èn vegnidas controlladas 196 abitaziuns. La verificaziun da las abitaziuns principalas aveva mussà ch'i deva dubis tar 71 da las 196 abitaziuns examinadas - pia passa in terz.
Ils proprietaris èn vegnids supplitgads da confermar l'utilisaziun cun in formular. Radund la mesadad ha pudì cumprovar la correcta utilisaziun, entant che tar var 30 abitaziuns èn necessarias ulteriuras examinaziuns, uschia la chanzlista da Puntraschigna, Jeannette Guadagnini envers SRF.
Pass futurs da la vischnanca
Il cussegl communal ha decidì d'elavurar in catalog da criteris per standardisar la verificaziun. Quest catalog vegn sviluppà cun agid da cussegls giuridics externs. La vischnanca vul uschia perfecziunar las controllas cun novs criteris e cun la nova sentenzia dal Tribunal federal ch'ha sclerì las pretensiuns giuridicas en quel cas. Cura ch'il nov catalog da criteris è avant maun, vegn la verificaziun cuntinuada. Tenor la vischnanca vegnian ils proprietaris e las proprietarias pertutgadas infurmadas persunalmain davart ils proxims pass.