Siglir tar il cuntegn

Header

cuntegn

Engiadina Puntraschigna: Damain vendita d'immobiglias chaschuna deficit

Il cussegl communal da Puntraschigna ha approvà il budget da l'auter onn. Ins quinta cun in minus da 2,9 milliuns francs.

Tar expensas da 29,2 milliuns francs quinta quel cun in minus da 2,9 milliuns francs. Cumpareglià cun ils onns avant è il deficit cunquai cleramain pli aut.

La raschun per quest resultat sajan damain entradas tar il gudogn entras la vendita d'immobiglias tar la taglia sin midada da possess. Dentant era la revisiun suenter 10 onns per il bogn cuvert e l'eveniment dal campiunadi mundial da skis da voluntaris procuran per custs che chaschunan quest deficit pli aut. Quai tenor ina communicaziun da la vischnanca.

Las investiziuns èn calculadas cun bun 7 milliuns francs.

Nov concept da social media

La suprastanza communala ha incumbensà Anja Hüsler, suppleanta actuara communala, cun l’elavuraziun d’in concept per ina nova strategia da social media per la vischnanca da Puntraschigna. Quai era en connex cun la surelavuraziun da la pagina-web «gemeinde-pontresina.ch». En futur vul ins era nizzegiar chanals sco facebook per la communicaziun da la vischnanca da Puntraschina.

Substituziun d'in conduct

Suenter lavurs da construcziun è in conduct d'aua da l'onn 1910 ruts. Ina reparatura era pussaivla, ella persvada dentant betg per il futur. Ins quinta cun custs da 170'000 francs per ina sanaziun durabla.

Prova da recicladi d'aua da naiv sin il glatscher Diavolezza

In project da visiun preveda da proteger il glatscher Morteratsch cun agid tecnic d'ina diminuziun. Avant il start dal project ston dentant anc bler dumondas da basa vegnir scleridas. La suprastanza communala approva 64'000.-- francs per in concept.

RR novitads 09:00

Artitgels legids il pli savens