A Puntraschigna è vegnida inoltrada il schaner in’iniziativa per mantegnair spazi da viver per indigens. L'iniziativa pretenda dapli emprimas abitaziuns, per quai duai vegnir adattada la lescha communala da segundas abitaziuns. Uschenumnadas abitaziuns da dretg vegl cun lubientschas da renovar u engrondir tranter ils 11 da mars ed ils 31 da december 2012 duain porscher in terz da lur surfatscha sco emprima abitaziun. Quai independent sche l’abitaziun restass er suenter la renovaziun in’emprima abitaziun.
Discussiuns davart realisaziun
Las uniuns da commerzi e mastergnanza, l’uniun da possessurs da chasas e la hotellaria da Puntraschigna èn cunter l’iniziativa ed han envidà ad ina sairada d’infurmaziun. Il punct principal che vegn crititgà è la realisaziun da l’iniziativa. Tenor las uniuns na saja quella betg pussaivla e las pretaisas sajan memia severas.
Radunanza communala decida
La suprastanza communala aveva decis da suttametter ina dumonda da principi – «SCHI u NA ad ina regulaziun d’emprimas abitaziuns» – al suveran. Sche l’iniziativa vegn acceptada ha la vischnanca d’elavurar ina proposta da la nova lescha communala da segundas abitaziuns.