Cun quasi in decenni retard, han cumenzà las lavurs da construcziun per l’Hotel Flaz sin la plazza Roseg a Puntraschigna. Suenter ina lunga procedura giuridica po l’hotel cun var 200 letgs ed investiziuns da passa 25 milliuns francs vegnir fabritgà.
Per nus è quai uss in di da tschertezza. Suenter blers onns dad intschertezza, pudain nus finalmain cumenzar cun noss project.
Il co-investur Luis F. Wieser è cuntent ch'i pon uss realisar il project che vegn ultra dad el co-finanzià da la famiglia Baumgartner. La finamira è da beneventar ils prims giasts sin la stagiun d'enviern 2028/29.
-
Bild 1 von 10. Il plazzal per il nov hotel a Puntraschigna nua che las lavurs han cumenzà l'entschatta zercladur. Bildquelle: Mayk Wendt / Hotel Flaz AG.
-
Bild 2 von 10. Il plazzal nua che las lavurs han cumenzà l'entschatta zercladur. Sche tut va tenor plan duess l'hotel avrir sin la stagiun d'enviern 2028/29. Bildquelle: Mayk Wendt / Hotel Flaz AG.
-
Bild 3 von 10. Il plazzal nua che las lavurs han cumenzà l'entschatta zercladur. Bildquelle: Mayk Wendt / Hotel Flaz AG.
-
Bild 4 von 10. Bildquelle: Mayk Wendt / Hotel Flaz AG.
-
Bild 5 von 10. La prima badigliada cun ils co-investurs Luis F. Wieser, Kurt Baumgartner, Walter Baumgartner sco er l'architect Hansjürg Stricker e l'interprendider Franco Wieser. Bildquelle: Mayk Wendt / Hotel Flaz AG.
-
Bild 6 von 10. Visualisaziun da l'hotel e da la plazza da sport da stad. Bildquelle: mess a disposiziun da la Flaz AG.
-
Bild 7 von 10. Visualisaziun da l'hotel e la plazza da sport d'enviern. Bildquelle: mess a disposiziun da la Flaz AG.
-
Bild 8 von 10. Visualisaziun da l'hotel cun la plazza da sport d'enviern. Bildquelle: mess a disposiziun da la Flaz AG.
-
Bild 9 von 10. Il co-investur Luis Wieser. Bildquelle: mess a disposiziun da la Flaz AG.
-
Bild 10 von 10. Il co-investur Kurt Baumgartner. Bildquelle: mess a disposiziun da la Flaz AG.
Baruffas giuridicas
Il project ha chaschunà opposiziun, adina puspè hai dà recurs. Ils adversaris avevan crititgà oravant tut las dimensiuns e la furma da l’hotel che na giaja betg a prà cun il purtret dal vitg da Puntraschigna. Vinavant eri per els impurtant da mantegnair la plazza da sport publica Roseg. Sco ils adversaris han ditg sin dumonda dad RTR, sajan els fitg dischillus e vulan spetgar sin la decisiun finala dal tribunal. Pir suenter sclereschian els eventuals ulteriurs pass per impedir il project.
Vischnanca planisescha investiziuns en la plazza da sport
Da vart da la vischnanca èsi previs da modernisar e cumplettar la plazza da sport Roseg geist dasper l'hotel. Tranter auter duai dar in nov bajetg da manaschi, in glatsch artifizial, divers indrizs polisportivs publics sco er ina plazza da gieu per l'entir onn. Quest project vegn l'avust a l'urna nua ch'il suveran da Puntraschigna ha l'ultim pled en chaussa.