Sin la loipa a Puntraschigna vegnan las passlunghistas ed ils passlunghists beneventads durant quest enviern persunalmain d’in concierge da passlung. Tenor Ursin Maissen, il directur da Puntraschigna Turissem, han ins lantschà il project da pilot per offrir in service a tut ils giasts ed indigens. Uschia è Gian Flurin Pfäffli, il giuven da 24 onns preschent sin la loipa, respunda dumondas da las passlunghistas e dals passlunghists e scumparta regalins.
Insatge auter ch'il mintgadi
Gian Flurin Pfäffli è passlunghist professiunal da Puntraschigna e fa part al BSV Pro-Team. Causa la pandemia da corona na po el questa stagiun betg absolver cursas internaziunalas sco previs, ed ha perquai temp da far sper il trenament la lavur da concierge sin la loipa. Per el è quest job ina buna diversitad a ses mintgadi sco sportist professiunal.
Cuntrapaisa a la digitalisaziun
La finamira da quest project da pilot è tenor Ursin Maissen tranter auter da dar cuntrapaisa a la digitalisaziun. Numnadamain duain las passlunghistas ed ils passlunghists a Puntraschigna vegnir beneventads persunalmain – ed esser en contact direct cun in indigen ed expert da passlung.