Per introducir a Puntraschigna «la cuminanza da votants a l’urna» (Urnengemeinde), avess la vischnanca da reveder la constituziun communala dal 2011. Uschia pudess ins agiunscher sper la radunanza communala er ina segunda varianta per decisiuns politicas.
Ulteriura alternativa per decider
Tenor l’iniziativa duessan cun la midada tranter auter er pudair vegnir decidì a l’urna davart: tschernas communalas, projects da plirs milliuns francs u er collavuraziuns cun autras vischnancas. Ultra da quai duessi er esser pussibel da renviar missivas da la radunanza communala cun 10% da las vuschs preschentas ad ina votaziun a l’urna.
Sustegnair dretg democratic
Sco che l’iniziant Fritz Hagmann ha declerà a RTR dettia quatter motivs concrets che hajan intimà l’anteriur commember da la suprastanza communala da Puntraschigna, da lantschar in’iniziativa en chaussa:
- Radunanzas communalas cun fitg bassa participaziun dals votants
- Giuvens che vivan durant l’emna ordaifer Puntraschigna na pon betg ir a radunanzas communalas.
- Per glieud pli veglia è l’urari savens memia tard la saira.
- Tuts na sa sentan betg bain tar votaziuns en sala d'ina radunanza communala.
La vischnanca saja uss vid examinar cun in giurist la finamira da l’iniziativa, suttascritta da 104 persunas. Tgenina posiziun che la suprastanza communala ha en chaussa, na saja betg anc enconuschent, scriva la vischnanca da Puntraschigna en l’ultim rapport ord il cussegl communal.
Temp per tractar quella ad ina radunanza communala, ha la vischnanca normalmain trais mais. Actualmain vala però causa il coronavirus ina sistida dals termins fin ils 31 da matg 2020.
