Siglir tar il cuntegn
Inhalt

Engiadina Purs engiadinais envidan a gronda festa sin bain puril

In comité da 6 persunas ha inizià entaifer paucs mais ina festa musicala a S-chanf, che duai attrair giuven e vegl.

purs
Legenda: Il comité d'organisaziun cun Arno Gabriel, Susanna Neves, Flurin Planta, Ruet Ratti e Jachen Andri Nuotclà. mad

La musica populara «Die jungen Zillertaler» duai attrair almain 300 persunas a la gronda festa sin il bain puril a S-chanf. Uschia fissan ils organisaturs buns da cuvrir almain ina part dal budget da bun 30’000 francs. Ina gronda part vegnia dentant dals sponsurs locals.

Finalmain puspè ina giada in bal

Sper la band austriaca, datti er musica da l’armonia Blazenka ch'è furmada da musicants indigens e da Salten Oberkrainer. Ch’ils purs da la regiun La Plaiv (La Punt Chamues-ch, Madulain, Zuoz e S-chanf) han organisà ina tala festa, haja da far cun il fatg ch’il temp dals gronds bals è passà ed il chalender d’occurrenzas en Engiadina betg gist plain durant ils mais avant la stagiun auta.

Nus n’avain betg memia bler temp liber, tuttina vulain organisar puspè ina giada ina festa en Engiadina
Autur: Arno GabrielPur da S-chanf

Aura è decisiva per success

La «Bauernhofparty.ch, il link avra en ina nova fanestra» ha lieu ils 17 da zercladur, cura che las temperaturas en Engiadina n’èn betg adina autas avunda per giudair ina saira or en il liber. Perquai è la festa sut tetg ed en localitads stgaudadas. L’aura gioga dentant adina er ina rolla cura ch’i va per bandunar la stiva chauda la saira, ha declerà Ruet Ratti da Madulain, ch'è in dals iniziants da la festa.

Purschì vegni er pussaivladads da parcar sper il bain puril Gabriel a S-chanf. Ultra da quai datti er in transport da shuttle. E pussaivladads da campar sin l’areal dal bain puril Gabriel a S-chanf.

Sche la premiera gartegia venderdi, ils 17 da zercladur 2016, vulan ils purs far daventar l’eveniment in punct fix en l’agenda dals Engiadinais er ils proxims onns.