Era ils davos onns ha la vischnanca da Scuol adina puspè gì da chattar soluziuns per pudair egualisar il dumber da scolaras e scolars sin las fracziuns. Avant onns han divers cumenzà il stgalim aut a Ftan en l’Institut Otalpin. Avant trais onns han ils uffants da scolina fatg viadi en direcziun la fracziun da Ftan. Ed ussa datti la situaziun che Sent ha memia paucs uffants, percunter è il dumber da scolaras e scolars a Scuol sez memia aut.
Cun in urari attractiv, animar dad ir a Sent a scola
Il cussegl da scola da la vischnanca da Scuol ha uss elavurà e preschentà als geniturs ina purschida speziala. A Sent ins prevesa dad instruir pli cumpact, plinavant far be in curt sur mezdi. Uschè han las scolaras e scolars la saira la pussaivladad da realisar lur hobis, per exempel cun far sport u musica.
Scuol ha il model da scola C perquai n’èsi betg pussaivel da far gronds midaments vid l’urari. A Sent fiss quai però pussaivel. Las scolaras e scolars han ussa anc temp da studegiar e decider sch’ellas ed els vulan ir en l’avegnir a Sent a scola.