«Quai è conferma e motivaziun»

Gianna Olinda Cadonau ha survegnì il premi Terra Nova da la fundaziun Schiller per ses debut sco autura da poesias, ses cudesch «Ultim'ura da la not», Marcella Pult-Palmara è vegnida undrada per sia traducziun per talian dal roman «La rumur dal flüm» dad Oscar Peer. Il premi è dotà cun 5'000 francs.

A sanestra Gianna Olinda Cadonau cun egliers, chavels lungs nair ed in vestgì blau, a dretga Marcella Pult-Palmara cun chavels tschurrs grischs ed ina giacca cotschna. Bild in Lightbox öffnen.

Legenda da maletgs: Las duas victuras dal premi Terra Nova, Gianna Olinda Cadonau (sanestra) e Marcella Pult-Palmara. RTR; Riccarda Müller

Per Gianna Olinda Cadonau è il premi ina grond'onur ma era ina conferma per sias poesias. I saja bel da badar che las poesias arrivan tar ils lecturs. L'autura da 34 onns scriva surtut sur da sia identitad. Ella è creschida si a Scuol suenter ch'ella è vegnida adoptada da l'India.

«  Quest tema tutga tar mai, è mia identitad e mia realitad e tuttina è el central per mai ed jau prend inspiraziun londerora. »

Gianna Olinda Cadonau
Victura premi Terra Nova 2017

Oz viva la giuvna autura a Winterthur cun sia famiglia e lavura sco responsabla per la cultura tar la Lia Rumantscha a Cuira. Il premi dat ad ella motivaziun da scriver enavant.

Gronda surpraisa

Marcella Pult-Palmara è stada surstada cura ch'ella ha udì ch'ella haja gudagnà il premi Terra Nova. Ella n'haja gnanc savì ch'i dettia quest premi. I saja dentant in «grondischem plaschair» da vegnir undrada per sia segunda traducziun dad Oscar Peer, per «La rumur dal flüm».

«  Jau translatesch enorm gugent, mintga traducziun è per mai in enritgament. »

Marcella Pult-Palmara
Victura dal premi Terra Nova 2017

Dapi questa stad è Marcella Pult-Palmara, ch'è oriunda da Roma ed ha instruì ils davos bundant 25 onns a la scola da pedagogia a Cuira, pensiunada. Novs project n'ha ella anc betg, ma ella veglia schon translatar enavant.

Il premi Terra Nova

Cun il premi Terra Nova undrescha la fundaziun Schiller dapi l'onn 2013 dad ina vart giuvens auturs e giuvnas auturas per lur debuts litterars e da l'autra vart traducturs per traducziuns dad ovras litteraras dad ina lingua naziunala en in'autra. Il premi è dotà cun 5'000 francs ed è vegnì surdà sonda a Lavin.

RR novitads 06:00