Siglir tar il cuntegn

Header

video
Tge capita uss cun Edy, il skiunz da lain?
Or da Telesguard dals 02.06.2017.
laschar ir. Durada: 2 minutas 20 Secundas.
cuntegn

Engiadina R.I.P. Edy?

Il cussegl communal da San Murezzan ha decis in «na» ad in credit per fabritgar si ad Edy, la figura da skiunz gigantica dal CM 2017, sin il nov areal da staziun da la Viafier retica.

Edy - figura legendara

Avrir la box Serrar la box

Cun 19 meters autezza e 6 tonnas pais è Edy stà ina figura da lain imposanta ed è daventà il simbol per ils Campiunadis mundials da skis. Ses num ha el dal skiunz indigen Edy Reinalter che era campiun olimpic l'onn 1948 a San Murezzan. La figura da lain Edy ha custà radund 500'000 francs.

Nua dess Edy, la figura da lain gigantesca che è stada il simbol per ils Campiunadis mundials da skis a San Murezzan sa platgar? Suenter la finiziun da las cursas era quai ina dumonda che fatschentava a blers. La devisa dentant era adina stada quella, che Edy duai sche pussaivel restar a San Murezzan.

Uss è surprendentamain tut auter: En sia sesida da gievgia saira ha refusà il cussegl communal da San Murezzan ina dumonda da credit da 320'000 francs per metter si danovamain ad Edy sin l'areal da la staziun nova da la Viafier retica a San Murezzan.

L'avegnir dad «Edy» resta cun quai intschert, tenor Franco Giovanoli, il directur da sport dals Campunadis mundials da skis 2017 a San Murezzan.

Il cussegl da vischnanca ha dimena refusà il credit da 320'000 francs per la midada e l'installaziun da la figura da lain, percunter ha el approvà il credit da 180'000 francs per sa participar vi da la realisaziun dal nov areal da la Viafier retica, là nua che la figura en lain fiss stada previsa.

Tge che capita uss cun Edy, che giascha actualmain sut ina blatga sin in parcadi tranter San Murezzan e Champfèr, n'è anc betg cler.

audio
Mezdi: San Murezzan: L'istorgia persunala dad Edy (glossa)
ord Actualitad dals 02.06.2017.
laschar ir. Durada: 2 minutas 11 Secundas.

Pauper Edy – ina glossa

Edy n’ha damai nagina perspectiva per in'existenza en sia patria a San Murezzan. Perquai s’annunzia el ina davosa giada tar la populaziun da sia vischnanca. Ina glossa da David Spinnler alias Edy.

RR novitads 20:00

Artitgels legids il pli savens