A chaschun da la radunanza communala da Schlarigna è Andrea Fanconi vegnì elegì sco nov president communal. El ha survegnì 182 vuschs, preschent eran 205 persunas. El è stà il sulet candidat e suonda a Christian Brantschen ch'ha demissiunà per la fin da l'onn.
Il nov president
L’um da 44 onns è maridà e bab da dus uffants e president da la partida Il Center d’Engiadin’Ota. El è enfin la fin da l'onn anc il schef da l’uffizi da scussiun e concurs da la regiun Malögia.
Senza in cumbat electoral e sco unic candidat, na saja la tensiun betg stada uschè gronda. Per la vischnanca da Schlarigna pero, saja quai pauc bun sch'i dat be in candidat per in uffizi uschè impurtant.
Qua ans vegn a stuair pensar vi da midaments dal termin da la votaziun, per attrair dapli candidatas e candidats per ils posts politics, ha Andrea Fanconi ditg avant sia elecziun.
Specificamain a Schlarigna n’è quai betg bun, sch'i vegn tschernì ils 4 da november. Per tscherta glieud na va quai betg da candidar. Il ristg è fitg grond.
Uschia dessan ins pensar da far questas tschernas gia en la stad. Ina elecziun uschè tard en l'onn saja problematica perquai che persunas ch'han interess vi d'in post ston dar giu la plazza senza savair sch'el u ella vegn elegì.
L’ureglia averta per mintgina e mintgin
La finamira dad Andrea Fanconi è d'avair dapli discussiuns cun ils votants e votantas dal vitg. Quai saja il pli impurtant.
Da collavurar, tadlar las vuschs, da mussar pertge ch’ins è per u cunter inqual chaussa. Ed er acceptar che betg tuts en da la medema opiniun. Quai è tut part da nossa democrazia.
Elecziun suprastanza
La radunanza communala ha era elegì la suprastanza communala. Per ils sis posts hai dà tschintg candidatas e candidats. Elegids èn
- Monica Günthard (en uffizi)
- Lino Andreazzi (en uffizi)
- Philippe Baud (nov)
- Felix Hunger (nov)
- Maria Cristina Fasol Cerutti (nov)