Il glindesdi passà ha la radunanza communala da Schlarigna approvà pliras fatschentas:
- La vischnanca dat a la Engadin St. Moritz Mountain SA ina concessiun d'explotaziun da material. Per il cas ch'ella dovra glera per in lai artifizial, po ella nizzegiar in territori d'explotaziun ch'ella ha gia nizzegià per in ulteriur lai artifizial (il «lej Alv»). I va per circa 160'000 meters cubic u 2'000 chargias d'in camiun. L'interpresa vegn a nizzegiar il material, sch'il material avant lieu n'ademplescha betg ils basegns.
- La vischnanca po installar molocs. Il vegl sistem da rimnar rument saja pretensius e na lubeschia betg ina separaziun da rument sco che la lescha pretenda. Per midar sistem approvescha la radunanza in credit da 600'000 francs.
- Per bajegiar enturn la staziun Trais Fluors datti in credit da 120'000 francs. La staziun da bus duai esser accessibla senza barrieras per persunas cun impediments.
- La vischnanca Schlarigna saja responsabla per in vehichel da remplazzament per ils pumpiers da San Murezzan. Dus vegls vehichels duain vegnir remplazzads cun in nov dal tip Amarok. Per quai approvescha la radunanza in credit da 90'000 francs.
- Diversas lavurs per sanar e meglierar la loipa da passlung duain vegnir fatgas. Per quai datti in credit da 430'000 francs. La vischnanca Puntraschigna sa participeschia cun 50'000 francs.
- In ulteriur credit approvescha la radunanza communala per l'infrastructura da far bogn al Lai da Staz. 150'000 francs vegnan approvads per renovar punts ed ina insla da nudar.
Las infurmaziuns èn dal protocol da la radunanza da la vischnanca Schlarigna. Las decisiuns sajan tuttas vegnidas approvadas cun grondas maioritads.
