Ina bova ord la Val Triazza l’onn 2015 ha chaschunà gronds donns en la vischnanchetta da Pradella sut Scuol. Donns da persunas n’hai dà nagins, quai grazia che las abitantas ed ils abitants èn vegnids evacuads a temp. Anc adina exista in grond ristg a Pradella e quai vul la vischnanca uss midar.
3 milliuns francs
Numnadamain ha la vischnanca elavurà in project da protecziun cunter aua gronda. Previs saja ch’ina chasa ha da vegnir sbuvada cumplettamain, uschia Arno Kirchen, il manader tecnic da la vischnanca da Scuol. Quella chasa sa chattia precis là nua ch’il material d’ina bova sa distgargiass. Vinavant è planisà d’auzar in mir a l’ur da la vischnanchetta e finalmain duai vegnir adattada ina puntetta da peduns e concepida uschia che quella s'avra en cas ch’i vegn material da surengiu. Ils custs totals per quest project prevesan radund 3 milliuns francs – la mesadad vegnia finanziada da Chantun e Confederaziun.
La radunanza communala da Scuol ha decis senza cuntravuschs ils 15 november 2021 da realisar il project. Las lavurs vegnan realisadas ils proxims dus onns.
