Siglir tar il cuntegn

Header

cuntegn

Ramosch Preschentà la strategia da biodiversitad da guaud 2035

La diversitad da sorts ed abitadis en il guaud è gronda, dentant periclitada en tschertas parts. Quai malgrà che la persistenza tar la cultivaziun dals guauds haja gia ditg ina gronda muntada.

Durant in temp pli lung hajan ins dà a la natira memia pauc spazi e temp per pudair svilupar ses process natirals. Perquai sajan plontas pli veglias oz sutrepreschentadas en il guaud. Per cumpensar quai, duvrassi plirs decennis senza in grond diever da l'uman. Cun stgaffir pli gronds reservats da guaud ed inslas da guaud vegl, survegnan quests proces puspè dapli spazi ed entras quai èn ils process natirals segirads a lunga vista. La cumpart dals reservats fa ora oz radund 3,3% dal guaud. Tenor la strategia da la biodiversitad da guaud 2035, duai questa cumpart vegnir auzada sin 5,5%.

audio
Strategia biodiversitad 2035
ord Actualitad dals 13.09.2021.
laschar ir. Durada: 2 minutas 57 Secundas.

Mantegnair structuras custaivlas

Per garantir la funcziun dal guaud, èsi impurtant da cultivar quel. Uschia pon ins stgaffir entras las dretgas acziuns ina diversitad structurala e mantegnair quella. Questas structuras porschan lura er il spazi da viver per blers animals e plantas. Per garantir che questa diversitad vegnia mantegnida, vegnan bleras da quellas surfatschas segiradas cun contract dal chantun ed ils possessurs da guaud, sco reservats da guaud spezials. Quests reservats duain vegnir sin ina cumpart da 5% da la surfatscha da guaud en Svizra. Cun 4,8% è il Grischun qua gia sin buna via.

Per mantegnair la buna qualitad da quels spazis da viver e bajegiar ora quels, possia questa marca perfin vegnir surpassada fin il 2035. Decisiv per realisar tals reservats da guaud spezials saja dentant che las vischnancas grischunas dovrian er quels.

Guaud da laresch vegn revalità

Il laresch haja in'impuranza gronda en bleras regiuns dal chantun. Entras quai èn sa furmads sur ils tschientaners blers guauds da lareschs. Sch'il potenzial per tals guauds è dà, pon mesiras gidar da revalitar quels guauds. Il medem mument vegn fixà ch'il cultivatur mantegna las structuras impurtantas per tals guauds.

Co il guaud po ademplir pliras funcziuns il medem mument, è da vesair vid l'exempel da Ramosch. Là è il guaud in impurtant spazi da viver, ma el ha er ina funcziun da protecziun. Grazia a l'acziun ch'ins ha fatg il 2019, vesian ins oz sin quest spazi ina regiuvinaziun dal guaud ed ina roscha schermigls da laresch ed ina vegetaziun vasta dad ervas.

RTR novitads 10:00

Artitgels legids il pli savens