Siglir tar il cuntegn

Header

cuntegn

Rapport SUST Concepts da segirtad per lavurs da mantegniment mancan

I manchian ils concepts per lavurs da mentegniment vid pendicularas che sajan en funcziun, vul dir per lavurs durant ch'ina pendiculara gira. I dettia sur l'entira branscha be paucas indicaziuns per segirar ina plazza da lavur durant che la pendiculara giria. A questa conclusiun vegn il Servetsch svizzer d'inquisiziun da segirezza (SUST).

Quai suenter ch'il servetsch ha intercurrì il cas, nua ch'in tecnicist è crudà il zercladur passà giu d'in pitga da la pendiculara da Diavolezza a Puntraschigna. Il mecanissem d'ina cabina aveva laschà pigliar l'um sin sia plattafurma da lavur. Sinaquai era el crudà 50 meters. El ha survivì perquai ch'el è dà giu sin ina cuverta da naiv da dus meters. Ma el è vegnì blessà grevamain.

Set accidents sumegliants dapi il 2005

Dapi il 2005 hai dà en Svizra set accidents sumegliants nua ch'ina part da la pendiculara haja laschà pigliar ina persuna durant lavurs da mantegniment. En la branscha da pendicularas na dettia, cuntrari p. ex. a la viafier, naginas directivas u prescipziuns da segirezza per lavurar durant ch'ina pendiculara saja en funcziun.

Il servetsch d'inquisiziun cusseglia d'elavurar tals concepts da segirezza. Plinavant duaja l'Uffizi federal per traffic controllar sche las pendicularas garanteschian la segirezza per lavurs durant ch'ils indrizs sajan en funcziun. Era duajan las interpresas guardar ch'il lavurers e las lavureras nizzegian consequentamain lur equipament da segirezza. Il tecnicist da la Diavolezza saja numnadamain crudà giu da sia plattafurma perquai ch'el avevia tratg or ses equipament da segirezza per pudair lavurar pli libramain, er perquai che la plattafurma era segirada cun in tschabargal. En ils blers cas da tals accidents haja però gist il fatg che las persunas hajan purtà in tal equipament da segirezza, evità pli grondas blessuras.

audio
Per tadlar: Las novitads da las 14:00
ord RTR Audio dals 01.11.2021.
laschar ir. Durada: 3 minutas 42 Secundas.

RTR novitads 14:00

Artitgels legids il pli savens