La deponia regiunala Bos-chetta Plauna sper la vischnanca da S-chanf serva gia dapi il 1997 sco deposit per glera, sablun e material da fabrica e stgav. Ussa dastga quella vegnir engrondida, il suveran ha ditg cleramain gea.
Nova deponia porscha spazi per proxims 20 onns
La nova deponia ha lieu per radund 1,6 milliuns meters cubic material. Ultra da quai è prevesì d'elavurar radund 650’000 meters cubic material en furma da sablun e glera sin il nov plazzal.
Cun quest engrondiment è segirà il spazi per ils proxims 20 onns – la durada dependa dentant da la futura activitad da construcziun en Engiadin’Ota.
Entradas da deponia impurtantas per vischnanca da S-chanf
Ils ultims 20 onns ha la deponia existenta manà radund 17,5 milliuns francs en la cassa da la vischnanca. Sper ils fits d’aua è quai la pli impurtanta entrada da S-chanf. Duri Campell renunzia sin 30% da l'import ch'el ha dabun per metter a disposiziun ses terren per engrondir la deponia Bos-chetta Plauna. Quels raps van a favur da la cassa da la vischnanca da S-chanf.
Cun l'engrondiment da la deponia resultan ils proxims 20 onns entradas da radund 14 milliuns francs per la vischnanca da S-chanf.
RR actualitad 12:10 ++
