Fundà il club da hockey da Zernez avevan avant 50 onns in pèr amaturs da hockey, sa regorda in dals co-fundaturs, Dumeng Duschletta. Surtut il fatg ch’i existiva gia en differents auters lieus clubs da hockey, haja finalmain intimà da realisar er en l’atgna vischnanca ina societad da sport d’enviern.
Baruffas e rivalitads
Signifitganta per ils emprims decennis da l’istorgia dal club da hockey da Zernez è era stada la rivalitad che regnava sin il glatsch tranter ils «magliachognas» e las squadras adversarias.
Surtut gieus cunter il club da hockey da Sent (entant è quel integrà dapi onns en il CDH Engiadina) eran famus per grondas baruffas ed ina u l'autra ferida dals giugaders suenter in derby engiadinais, sa regorda Duschletta:
Ils gieus cunter ils da Sent sumegliavan mintgatant plitost ad in tagliar laina en il guaud che ad in match da hockey!
Entant è la tecnica da giugar a hockey sa midada marcantamain en congual cun anc avant 20 enfin 30 onns. L’emprima squadra dal HC Zernez gioga dapi plirs onns en 3. Liga.
3. liga e collavuraziun activa per la giuventetgna
Actualmain saja la situaziun dal Club da hockey Zernez fitg buna. Sper l’emprima squadra ed ina squadra da seniors porscha il HC Zernez er als pli giuvens hockeyaners la pussaivladad d’emprender e giugar il sport sin il glatsch.
Per pussibilitar als giugaders pli talentads ed ambiziunads dapli, collavura il HC Zernez er cun autras squadras. Oravant tut cun il CDH Engiadina, nua che 2 fin 3 giugaders da Zernez èn questa stagiun en acziun, uschia il president dal HC Zernez, Jörg Rodigari.
Motiv per far festa
En occasiun dal giubileum ha il HC Zernez envidà ad in inscunter per festegiar l’anniversari da la societad. Dad ina vart cun in turnier da hockey per uffants l’avantmezdi.
Il suentermezdi èn sa duelladas differentas squadras en il turnier maschadà. Da la partida èn er giugaders d’ina squadra da la Baviera. La saira ha il club envidà ad ina sairada da giubileum cun musica e trategniment.
RR Sportissimo 17:05+