Siglir tar il cuntegn
Inhalt

Engiadina Raspada evangelica Zuoz-Madulain vul tuttina fusiunar

La raspada evangelica Zuoz-Madulain è revegnida a sia decisiun da la fin da zercladur ed ha decis cun 39 encunter 14 vuschs d'acceptar il contract da fusiun cun las autras 7 raspadas in Engiadin'Ota.

la baselgia da Zuoz
Legenda: La plaiv evangelica Zuoz-Madulain vul ussa tuttina fusiunar cun las autras plaivs da l'Engiadin'Ota. RTR

Ils 20 zercladur 2016 aveva la Corporaziun evangelica Zuoz-Madulain decidì cun 29 encunter 24 vuschs da betg vulair fusiunar cun las autras plaivs en Engiadin'Ota. La dumonda da reponderaziun da la suprastanza da la plaiv evangelica Zuoz-Madulain ha ussa purtà ina nova decisiun.

Psalms e dus chaleschs

La radunanza extraordinaria da la plaiv Zuoz-Madulain ha decidì cun 39 encunter 14 vuschs d'acceptar la proposta da reponderaziun e d’acceptar il contract da fusiun. Uschia van ussa tut las 8 plaivs da l'Engiadin'Ota tranter Segl e Cinuos-chel d'accord da fusiunar per ils 1. da schaner 2017. Discussiuns animadas han er chaschunà ils psalms da Sveling e dus chaleschs ch'èn en possess da la corporaziun da Zuoz-Madulain. La proposta d'in commember da surdar tut quai a la vischnanca politica n'ha la radunanza dentant betg acceptà.

Surmuntar vacanza

La suprastanza da la corporaziun evangelica Zuoz-Madulain ha da surmuntar uss in pèr mais en furma reducida. Sper il president, ch'era sa retratg per immediat suenter la decisiun il zercladur, è sortida anc in'ulteriura commembra da la suprastanza. Tenor il suprastant Roman Bezzola, che ha manà la radunanza extraordinaria, vessan ils commembers restants da savair surmuntar la vacanza fin che la nova organisaziun è en funcziun.

En ina radunanza cuminaivla la fin da november / cumenzament da december, vegnan a vuschar tut ils commembers da las 8 plaivs davart ils statuts da la nova organisaziun.

RR actualitad 07:00