Millis da cunfinaris lavuran en l'Engiadin’Ota. Ed era turistas e turists da l’Italia èn dapi decennis giasts bainvis en la regiun. Questa amicizia vicendaivla para dentant apparentamain da patir cun la derasaziun dal coronavirus.
Motiv è in flyer anonim che pretenda cun frasas rassisticas ch’ils talians duain svanir enavos en l'Italia. Vegnì chattà èn quels d’in frontalier il venderdi saira sin almain quatter autos talians sin in parcadi a Puntraschigna.
La vischnanca da Puntraschigna ha en il fratemp era prendì enconuschientscha da quest cas. Ella sa distanziescha ferventamain da questas expressiuns rassisticas e deplorescha che talas parolas vegnan proclamadas. Quai en spezial durant quest temp difficil, nua che mintga singul stuess en sasez restar calm e mussar solidaritad visavi concarstgauns.
Ina denunzia na datti dentant anc betg. Quai conferma la polizia sin dumonda da RTR. Dentant sajan ins uss vid sclerir sche ulteriuras mesiras en chaussa sajan necessarias.
«Social Distancing» enstagl da rassissem
L'istoricher Philipp Sarasin, che s'occupa spezialmain cun epidemias di: «Sa chapescha èn il mument Talianas e Talians pertutgads spezialmain. Igl è senz’auter pussibel che persunas da l’Italia hajan infectà persunas da l’Engiadin’Ota. Che quai chaschuna malsegirezza u perfin tema è chapibel. Dal tut fallà èsi però, sch’ins reagescha cun parolas rassisticas. Ins na dastga betg stigmatisar ils Talians, ins duai però resguardar las reglas igienicas ed il "social distancing".»
Il professer da l’universitad da Turitg di vinavant che las autoritads da Puntraschigna hajan reagì bain en quest cas: «La reacziun clera da la vischnanca cunter il rassissem è la dretga reacziun, dapli na ston ins betg far en quest mument.»