Dapi var quatter onns vegnia constatà ina reducziun constanta da giasts talians en Engiadin’Ota. Tenor il pledader da medias da la Engadin St. Moritz Tourismus AG, Roberto Rivola, na saja il nausch curs da l’euro l’unic motiv. Pervia da la situaziun economica critica en l'Italia, scursaneschan ils Talians adina dapli lur vacanzas.
Pli baud vegnivan ils giasts per pliras emnas en vacanzas. Oz vegnan blers mo per ina fin d’emna prolungada.
Tenor Roberto Rivola mancan ils giasts oravant tut en ils hotels e main en las abitaziuns da vacanzas. Perquai hajan els lantschà uss ina nova strategia. Per puspè reconquistar giasts talians, sa drizza il turissem en Engiadin’Ota uss plitost a giasts pli ritgs empè da sa drizzar a la massa.
Nus ans drizzain a la «High-end clientella».
Schebain questa strategia ha success, demussan lura las cifras dals proxims onns.
RR novitads 12:00