Ils emprims onns da vita èn decisivs per il svilup d'in uffant, di Prisca Anand, suprastanta da San Murezzan e commembra da la gruppa da lavur che ha elavurà la strategia.
Cun il post da coordinaziun vulain nus simplifitgar la tschertga da purschidas prescolasticas per ils geniturs.
La strategia da promoziun prematura da l’Engiadin’Ota vul sustegnair famiglias, promover egualitad tranter ils uffants ed optimar las schanzas d'educaziun. Ella sa basa sin tschintg champs d'acziun: svilup dal portafegl d'offertas, meglieraziun da la rait da collavuraziun, infurmaziun e sensibilisaziun, optimaziun da las cundiziuns generalas e coordinaziun.
Crear ina centrala da coordinaziun
Ina mesira centrala è la fundaziun d'ina centrala da coordinaziun che vegn manada da Pro Junior Grischun. Questa instituziun surpiglia incumbensas organisatoricas e strategicas per rinforzar la collavuraziun tranter las differentas vischnancas e per meglierar l'accessibilitad da las offertas.
Finanziaziun communabla
Las vischnancas da l'Engiadin'Ota investeschan ensemen CHF 70'000 per onn durant quatter onns. Ils custs vegnan distribuids tenor ina clav regiunala. Mintga vischnanca ha dad aderir a la cunvegna da prestaziun cun Pro Junior Grischun. La gronda part da las vischnancas po far quai en suprastanza, perquai ch'ils custs na surpassan betg lur cumpetenzas finanzialas. Il rest dals vitgs duain purtar la fatschenta davant lur radunanza communala.
In pass innovativ regiunal en il Grischun
La strategia represchenta ina novaziun per il chantun Grischun, cunquai ch'igl è l'emprima giada ch'in tal post da coordinaziun vegn realisà en ina regiun. La finamira è da garantir in sustegn effizient e coordinà per las famiglias e lur uffants.