Lorenzo Polin ha 36 onns ed è actur, prelectur, organisatur, moderatur ed actualmain vid la scolaziun da purs. Dapi intgins onns dat el vinavant la passiun per il teater a giuvenils en Engiadin’Ota. Quai oravant tut cun sia societad da teater cun il num «DRAUFF», sco Fadri Guidon, il president da la cumissiun da cultura da la regiun Malögia ha ditg a la conferenza da presidents. La regiun ha decis d’onurar l’engaschi dal Samedrin cun il premi cultural da la regiun Malögia, dotà cun 10'000 francs.
La Gammeter Media SA e la redacziun da la Posta Ladina survegnan il premi d’enconuschientscha da 2'000 francs. Quai per l’engaschi da rapportar ed infurmar la Val ed er sur ils cunfins sur da la cultura en la regiun, gist en quest temp difficil da la pandemia. Il giuven musicant Simon Gabriel da S-chanf survegn il premi da sustegn, dotà cun 5'000 francs.
La surdada dals premis è prevesida ils 28 da schaner a Samedan.
