Las regiuns da skis han gì radund 40% damain skiunzas e skiunz sin pista durant Nadal. En general èn vegnids damain giasts a far vacanzas en Engiadina e las valladas dal sid. L’hotellaria noda in minus da 25% enfin 70% giasts. Las abitaziuns da vacanzas èn percunter bain occupadas. Quai resulta dad ina emprima retschertga incumbensada da la Taskforce «Corona II Engiadina».
Causa damain skiunzas e skiunz sin las pistas han era las staziuns da salvament en las regiuns da skis communitgà radund 50% damain accidents, cumpareglià cun l’onn passà. Oravant tut han quest onn dapli persunas gì problems pervi da las temperaturas fitg fraidas ed han pervi da quai stuì vegnir tgiradas da las staziuns da salvament.
Ils ospitals regiunals ed era la clinica Gut a San Murezzan han dumagnà la situaziun d’accidents senza problems, quai tenor la retschertga surmenziunada.
Samignun ha nudà massivamain pli paucs giasts
Normalmain haja il territori da skis enturn 17'000 fin 20'000 giasts durant ils dis tranter Nadal e Bumaun. Quest onn sajan quai anc stà radund 10%. Tge che saja dà en egl saja ch'ils giasts sajan en emprima lingia stads Svizzers. Uschiglio hajan ins dapli giasts da l'exteriur, ha declerà il directur da las pendicularas Samignun, Mario Jenal.
Suenter la buna stad avevan ins sperà ch'i dettia er l'enviern blers giasts svizzers, ma las malsegirezzas enturn mesiras da corona hajan sur tut tegnì a chasa giasts pli vegls. Quai sentian ins er tar la hotellaria cun giasts pli vegls en mira. Hotels per giuvens e famiglias sajan cudeschads meglier en la val, ha declerà Martina Stadler, la directura dal Turissem Engiadina Bassa, Val Müstair e Samignun.