Siglir tar il cuntegn

Header

Dus skiuns sin la Diavolezza.
Legenda: Pervi da la pandemia en quest onn sur Nadal vegnids damain giasts en Engiadina. Keystone
cuntegn

Regiuns da skis Engiadina Damain giasts e damain accidents cun skis

Sur ils dis da Nadal ha l'Engiadina registrà var 40% damain giasts e bunamain be la mesadad dals accidents sin pista, cumpareglià cun il temp da Nadal da l’onn passà.

Las regiuns da skis han gì radund 40% damain skiunzas e skiunz sin pista durant Nadal. En general èn vegnids damain giasts a far vacanzas en Engiadina e las valladas dal sid. L’hotellaria noda in minus da 25% enfin 70% giasts. Las abitaziuns da vacanzas èn percunter bain occupadas. Quai resulta dad ina emprima retschertga incumbensada da la Taskforce «Corona II Engiadina».

Causa damain skiunzas e skiunz sin las pistas han era las staziuns da salvament en las regiuns da skis communitgà radund 50% damain accidents, cumpareglià cun l’onn passà. Oravant tut han quest onn dapli persunas gì problems pervi da las temperaturas fitg fraidas ed han pervi da quai stuì vegnir tgiradas da las staziuns da salvament.

Ils ospitals regiunals ed era la clinica Gut a San Murezzan han dumagnà la situaziun d’accidents senza problems, quai tenor la retschertga surmenziunada.

audio
Per tadlar curt e cumpact
00:59 min, RTR Audio dals 28.12.2020.
laschar ir. Durada: 00:59 minutas.

Samignun ha nudà massivamain pli paucs giasts

Normalmain haja il territori da skis enturn 17'000 fin 20'000 giasts durant ils dis tranter Nadal e Bumaun. Quest onn sajan quai anc stà radund 10%. Tge che saja dà en egl saja ch'ils giasts sajan en emprima lingia stads Svizzers. Uschiglio hajan ins dapli giasts da l'exteriur, ha declerà il directur da las pendicularas Samignun, Mario Jenal.

audio
Territori da skis da Samignun ha gì massivamain pli paucs giasts
02:38 min, Actualitad dals 29.12.2020.
laschar ir. Durada: 02:38 minutas.

Suenter la buna stad avevan ins sperà ch'i dettia er l'enviern blers giasts svizzers, ma las malsegirezzas enturn mesiras da corona hajan sur tut tegnì a chasa giasts pli vegls. Quai sentian ins er tar la hotellaria cun giasts pli vegls en mira. Hotels per giuvens e famiglias sajan cudeschads meglier en la val, ha declerà Martina Stadler, la directura dal Turissem Engiadina Bassa, Val Müstair e Samignun.

RTR novitads 17:00

Artitgels legids il pli savens

Scrollar a sanestra Scrollar a dretga