Là nua ch'i dat normalmain grond travasch da skiunzs e snowboardists, èsi ussa quiet: las cabinas èn deponidas en garascha. Mo ils collavuraturs da l’administraziun èn confruntads cun las dumondas per lavur curta per tut ils collavuraturs e stagiunaris.
Sa preparar per la stad
Il mument n'èsi betg enconuschent, cura che las pendicularas dastgan puspè metter en funcziun lur gestiun. Las lavurs da revisiun na pon er betg vegnir realisadas ord motivs da segirezza. Era far reclama per la proxima stad n’è betg propi realisabel senza savair il termin d’avertura.
Per Andri Poo, directur da las Pendicularas Scuol SA, èsi ussa impurtant da coordinar tut las gestiuns turisticas, sco hotels, Bogn Engiadina e pendicularas per quel di d’avertura.
Credits dal maun public nagina schliaziun a lunga vista
L’Associaziun Pendicularas Grischuna beneventa las mesiras dal chantun e da la Confederaziun, oravant tut la spertadad cun inoltrar lavur curta per ils collavuraturs. La problematica da las pendicularas èn ils custs fixs, sco per exempel ils custs dal chapital, las amortisaziuns ed oravant tut ils custs da mantegniment.
Cun metter a disposiziun a curta vista credits che ston vegnir restituids na saja la situaziun betg schliada, di il president da l’Associaziun Pendicularas Grischuna, Martin Hug, envers la Posta Ladina. Las pendicularas dependian dal sustegn da privats, investiders u vischnancas. Sustegns finanzials da la vart da chantun e Confederaziun mainian a distorsiuns da la concurrenza – e quai fissia zunt spinus.
