La preparaziun da la loipa da 42,5 km tranter Malögia e S-chanf è gartegiada cumplettamain, conferma Martin Stupan il schef da traject dal maraton da skis engiadinais. Sulet singuls lieus sin ils lais d’Engiadin’Ota hajan ins gì da preparar ils ultims dis be cun maschinas pli ligeras (Skidoo) per pressar la naiv ad ina surfatscha cumpacta.
Maschinas da far pista en acziun
Entant possian era las maschinas grondas passar senza problems quels puncts e preparar la loipa sur l'entir traject. Totalmain èn 12 maschinas da far pistas en acziun la notg avant il maraton.
Dario Cologna e bell’aura attiran
Entant s’hajan annunziads bun 12’800 curriduras e curridurs per la gronda cursa populara da dumengia. Ils organisaturs fan dentant quint cun numerusas annunzias durant ils ultims dus dis. Quai d'ina vart pervi che las previsiuns da l’aura èn fitg bunas, da l’autra vart è la participaziun dal champiun olimpic Dario Cologna a la 48avla ediziun dal maraton in factur ch'animeschia anc a blers sportist da s’annunziar.
Il 48avel maraton da skis engiadinais ed il 9avel mez maraton da Malögia a Puntraschigna èn dumengia ils 13 da mars 2016. La partenza è a partir da las 08:30.