Empè d’ina perdita da passa 842’000 francs, serra il rendaquint 2020 da la vischnanca da San Murezzan cun in plus da 269’000 francs.
Sco il president communal, Christian Jott Jenny ha explitgà en la sesida dal parlament, hajan las expensas pudì vegnir reducidas sco planisà e quai malgrà la situaziun difficila influenzada tras la pandemia.
Il parlament da San Murezzan ha approvà il rendaquint 2020 a maun dal referendum facultativ per ils 1. da zercladur.
Bunas perspectivas
Era il rendaquint 2021 vegnia influenzà da la pandemia e sias consequenzas, uschia Jenny. Per exempel cun naginas u paucas entradas dal Bogn Ova Verva u er cun dapli expensas per custs da protecziun. Dentant surpassian gia uss las midadas da possess il budget cun 2,9 milliuns francs.