Questa dumonda sto in procuratur public ni in derschader respunder.
En il center da l'entira istorgia stat la surdada da lavurs per la renovaziun da la ruina da baselgia San Gaudenzio sur Casaccia. Dad ina vart Anna Giacometti, la presidenta communala, ch'è liada cun l'architect da la renovaziun. Da l'autra vart Emilio Giovannini, anteriur suprastant, ch'è persvadì che la vischnanca e las firmas involvidas n'han betg sa tegnì vi da las proceduras da submissiun.
Giovannini era ì enfin tar la regenza grischuna cun sias reproschas. Il chantun ha sin quai sclerì quellas e mess quellas ad acta senza consequenzas giuridicas. Il schaner 2017 ha el perquai bittà nà ses uffizi.
Novas reproschas envers Giacometti
Il december 2018, trais dis suenter la candidatura d'Anna Giacometti per il Cussegl naziunal, ha Emilio Giovannini lura publitgà novas reproschas envers Anna Giacometti en la gasetta digitala «La Bregaglia». Ella haja duvrà sia adressa da mail durant 49 dis senza ses savair, ella haja scrit enturn protocols da la suprastanza e protegì ses partenari en connex cun il «cas San Gaudenzio» cun tut ils meds pussaivels.
Il schaner ha Anna Giacometti prendì posiziun en la gasetta digitala e refusà tut las reproschas. Entant ha ella inoltrà plant encunter Emilio Giovannini ed cunter nunenconuschent.
Sustegn da suprastanza communala
La suprastanza communala ha decidì da sustegnair sia presidenta communala e da surprender ils custs per sa defender per ses dretgs da persunalitad enfin ch'i dat ina sentenzia.
Ni Anna Giacometti, ni la vischnanca Bregaglia, ni Emilio Giovannini vulan prender posiziun. Els sa refereschan sin ina procedura currenta.
RR actualitad 17:00