L'ovra electrica Morteratsch producescha 7 uras gigawatt l'onn suenter questa renovaziun. Quai è il dubel da la producziun d'enfin ussa e tanscha per 2'000 chasadas. La renovaziun custa radund 10 milliuns francs.
Daners che la Repower n'ha betg sezza. 90% da l'investiziun paja in investur, ina banca privata, la Repower investescha 10%. Che l'investiziun po render è be pussaivel pervia che l'ovra survegn subvenziuns dal stadi per la producziun d'energia. Quai pervia ch'ì sa tracta d'ina ovra electrica pitschna.
Fabritgar projects gronds n'è betg pussaivel
L'ovra electrica Morteratsch serva uschia a la Repower era per far reclama per l'energia producida cun aua. Actualmain han ins numnadamain difficultads pervia ch'ils pretschs per l'energia èn fitg bass. La Repower spera dentant che la situaziun economica midia puspè. Projects pli gronds sco l'ovra Lago Bianco sil pass dal Bernina u l'ovra Chlus en il Partenz na pon ins actualmain betg finanziar.
RR actualitad 17:00