Siglir tar il cuntegn

Header

cuntegn

Engiadina Reservat da Biosfera e label Unesco: La regenza sustegna

La regenza grischuna ha examinà il nov plan da management dal Reservat da Biosfera Engiadina Val Müstair e propona a la Confederaziun dad inoltrar la dumonda per mantegnair il label Unesco a Paris.

surdada dal label
Legenda: La surdada dal label Unesco l'onn 2010 per il Reservat da Biosfera Engiadina Val Müstair. RTR/David Spinnler

Dapi l'onn 2010 ha il Reservat da Biosfera Engiadina Val Müstair il label da l'Unesco. Quai dentant be culla cundiziun dad anc stuair stabilir ina zona da tgira enturn il Parc Naziunal. Ussa sustegna la regenza grischuna la nova dumonda per pudair mantegnair quest label. Il Reservat da Biosfera cun ils trais partenaris Parc Naziunal, Biosfera Val Müstair e Scuol ha elavurà in nov plan da management. Quel mussa che ina gronda part da la zona da tgira enturn il Parc Naziunal è stabilida. Da constituir 100% da la zona da tgira n'è betg stà pussaivel pervia che las vischnancas da S-chanf e Zernez n'han betg ditg gea als contracts necessaris.

A la fin decida Paris

La regenza grischuna propona a la Confederaziun dad inoltrar la dumonda per mantegnair il label Unesco a Paris. Ils gremis da l'Unesco ston lura decider sche il label Unesco resta tar il Reservat da Biosfera Engiadina Val Müstair u betg.

Artitgels legids il pli savens