La fundaziun da l'Ospital chantunal dal Grischun surpiglia per immediat tuttas aczias da la Clinica Gut a San Murezzan e duas persunas fan part dal cussegl d'administraziun. La gruppa privata da clinicas grischuna consista da duas clinicas ortopedicas a San Murezzan e Fläsch sco er sis praticas en ils chantuns Grischun, Son Gagl, Turitg e Tessin. Il manaschi resta sut la medema direcziun e vegn manada sco interpresa independenta cun atgna economia da manaschi e finamiras correspundentas. En avegnir duain vegnir nizzegiadas sinergias.
La cumpra da la Clinica Gut pussibilitescha ina schanza unica da rinforzar l'ortopedia en Grischun sin il palc naziunal ed a moda persistenta.
La Clinica Gut porschia in'agiunta opitmala a l'Ospital chantunal dal Grischun. Questa cumpra segireschia il provediment da sanadad en Grischun per ils proxims onns.
Ina schliaziun grischuna per l'avegnir
Cun la vendita han ils set medis partenaris, ch'èn ils possessurs da la Clinica Gut, vulì garantir a lunga vista ch'il manaschi vegnia mantegnì. Ils proxims onns vegnan numnadamain plirs dals medis partenaris pensiunads, ha declerà Dr. med. Adrian Ufer che ha surpiglià avant passa 30 onns la clinica cun partenaris.
Cun l'ospital chantunal èsi gartegià da chattar in cumprader grischun che stat per cuntinuitad e che garantescha l'avegnir da las clinicas e praticas. Uschia datti ina rait medicinala da la quala il pievel po profitar.
La Clinica Gut mantegna ses num. Er las var 250 plazzas da lavur vegnan mantegnidas ed uschia er las duas clinicas e las sis praticas che suttastattan a la Clinica Gut. Tras questa cumpra duain las duas interpresas er pudair sa posiziunar meglier e rinforzar vinavant il svilup da qualitad.
