Suenter sis onns è Riet Campell decis da laschar davos sai la vita politica. Cun 71 onns vul el uss sa deditgar a ses bainbaud nov biadis ed biadias. Per la populaziun da S-chanf vul quai dir ch'i ston tschertgar ina nova persuna a la testa da lur vischnanca. Duas persunas candideschan, uschia ch'i dat in cumbat electoral.
Dus candidats
Gian Andrea Bott n’è betg in nunenconuschent en la politica communala da S-chanf. El era gia en uffizi sco suprastant ed era sco vicepresident. El ha 57 onns, è creschì si a S-chanf, ed ha dunna e quatter uffants. Da professiun è el pur cun ina puraria gist dador il vitg. Igl è la terza giada ch’el candidescha per il presidi.
Luzi Parli è era creschì si a S-chanf. Entant è l’um da 65 onns pensiunà, ed ha temp da sa deditgar al post a la testa da la vischnanca. El era gia avant trais onns candidat per il presidi, uschia èsi quest la segunda giada ch’el vul vegnir president.
Nagins midaments en il rest da la suprastanza
Tut il rest da la suprastanza da S-chanf vul far vinavant en lur post politic:
- Vicepresident Heinz Thomas (fin qua)
- Paolo Bernasconi (fin qua)
- Werner Haltinner (fin qua)
- Liun Quadri (fin qua)
En la cumissiun da gestiun duain vegnir elegids trais commembers, dentant en entradas quatter candidaturas:
- Curdin Joos (fin qua)
- Cornel Widmer (fin qua)
- Andri Christoffel (nov)
- Jakob Fuchs (nov)
Il suveran da S-chanf decida ils 26 d’october a l’urna co che la testa da la vischnanca duai guardar ora per il trienni 2026 – 2028.