Durant in'emna intensiva emprendan ils 270 participants en il champ da l'Uniun svizra da sanitad militara (SMS) e la Crusch Cotschna (SRC) a S-chanf la basa da l'emprim agid d'urgenza. Las enconuschientschas ch'ils giuvenils emprendan en trais differents nivels, sajan savens er in trampolin per la via da carriera en las professiuns sanitaras, suttastritga Jack Bähler, il schef dal champ AULA («Ausbildungslager»). El è dapi 20 onns da la partida al champ AULA.
Var 40% dals participants e las participantas dal champ d'AULA instradeschan pli tard ina professiun en direcziun tgira u medischina.
Il champ saja er ina preparaziun optimala per ils futurs schuldads sanitars e da salvament sco er per ils confamigliars dal servetsch da la Crusch cotschna. Il team da direcziun e da scolaziun consista da passa 140 persunas voluntaras dal SMS, SRC e commembers da l'armada.
A la fin da l'emna cuntanschan ils participants in certificat. Quel vegn renconuschì e vala er sco curs d'agid d'urgenza per l'examen d'auto.