Las votantas ed ils votants han elegì Gian Andrea Bott sco nov president da vischnanca da S-chanf – quai cun 163 vuschs. Il pli absolut era tar 124. Il cuntracandidat, Luzi Parli, ha survegnì 66 vuschs, scriva la vischnanca da S-chanf.
Gian Andrea Bott ha 57 onns, è creschì si a S-chanf ed ha dunna e quatter uffants. Da professiun è el pur cun ina puraria gist dador il vitg.
Ils ulteriurs quatter commembers da la suprastanza da S-chanf han ins reelegì. La participaziun a las votaziuns da la suprastanza e dal presidi è tenor la vischnanca stada tar bunamain 55%.
Che la suprastanza stat a disposiziun per in'ulteriura perioda d'uffizi vesa Gian Andrea Bott sco grond avantatg. Quai ha el gia ditg avant las elecziuns. Sper la cuntinuitad en la suprastanza communala gidia quai er da vegnir pli spert en la materia al nov president communal.
Sch'ils meds finanzials n'èn betg avant maun, lura na duain ins betg cumenzar cun projects.
Per Gian Andrea Bott è la disciplina fiscala in punct fitg impurtant. Quai vul dir che tut ils projects planisads vegnian be analisads ina giada e la finanziaziun duai sche pussaivel vegnir fatga cun agens meds.
Riet Campell è pront per in nov chapitel
Suenter sis onns ha il president communal da fin qua, Riet Campell, decis da bandunar la vita politica.
D'ina vart ma vegn a mancar insatge. Da l'autra vart èsi cun 71 onns temp da chalar.
Cun 71 onns vul el uss enstagl sa deditgar a ses bainbaud nov biadis ed biadias.
Ulteriurs resultats da l'elecziun
En la cumissiun da gestiun èn vegnids elegids
- Curdin Joos
- Cornel Widmer
- Andri Christoffel
betg tanschì hai per
- Jakob Fuchs
Ed en il cussegl da scola èn
- Armon Godly
- Seraina Luzi