Siglir tar il cuntegn

Header

Vista sin S-chanf l'enviern, davant la via che fa ina cura, davos il vitg enramà da las muntagnas.
Legenda: La procura publica vegn a stuair s'occupar da las irregularitads en la vischnanca da S-chanf. MAD, ANR
cuntegn

S-chanf La nova suprastanza surdat il «cas S-chanf» a la procura publica

Quai scriva ella en ina communicaziun a las medias. Datas e documents duain vegnir surdads dal giurist communal e quai uschè svelt sco pussaivel.

En sia emprima seduta è la nova suprastanza da S-chanf s'occupada da l'examinaziun ch'in biro extern ha fatg. Ella ha decidì da surdar l'examinaziun a la procura publica dal chantun Grischun. La suprastanza spera da pudair survegnir cun quest pass la libertad per cumenzar effizientamain cun la lavur administrativa da la vischnanca e da l'uffizi forestal. Dapli infurmaziuns na dat la vischnanca betg.

L'examinaziun dal biro extern è vegnida a la conclusiun ch'igl ha dà tranter auter mancanzas tar la direcziun da la gestiun forestala e tar l'andament da la vischnanca durant ils onns 2014 fin 2018 (guarda artitgel da vart sut). L'examinaziun era vegnida fatga sin incumbensa da la suprastanza veglia suenter che quella aveva dispensà il silvicultur l'atun 2019.

Per Claudia Nievergelt Giston, l'advocata dal selvicultur, è la decisiun da la suprastanza communala gista. Uschia haja ina instanza independenta en mauns l'examinaziun. Per ses mandant valia vinavant la presumziun d'innocenza.

Per tadlar curt e concis:

RR novitads 11:00