La fundaziun Scaletta S-chanf vuleva uriundamain finir las lavurs da renovaziun e reavrir l’Hotel Scaletta per la fin da quest onn che vegn. Uss è planisà da cumenzar la renovaziun quest atun.
Custs pli auts – plan fix
Cun analisar las offertas per la renovaziun hajan ins vis ch'ils cust en creschids da 14,7 milliuns francs, cun reservas, sin passa 15 milliuns francs senza reservas, di il vicepresident dal cussegl da fundaziun, Niculin Arquint. Uss è d’analisar e reponderar la situaziun. La fundaziun na possian ins betg midar ils plans e cun quai far vegnir pli bunmartgà la fabrica. Quai pervi da las empermischuns fatgas a la fittadina dal renovà hotel, la REKA. La fundaziun ha offrì in albiert cun 28 stanzas, 8 appartaments ed ina ustaria, e quai vul la fundaziun Scaletta S-chanf era accumplir.
Dentant mo adina en tschertga da support
Gia dapi il cumenzament da la fundaziun avant tschintg onns è la tschertga da sponsurs e donaturas per il project da sanaziun la pli impurtanta lezia da la fundaziun. Era uss è l’organisaziun avis sin donaziuns per realisar il project. Las portas da l'hotel Scaletta renovà duain vegnir avertas per la stagiun d’enviern dal 2027/2028.
Quai vegn e quai sto vegnir, nus sco fundaziun Scaletta S-chanf vulain sviluppar l’hotel a S-chanf. Quai è fitg bel per il vitg, sch'ins guarda enavos e po dir ch'il temp da spetga ha rendì.
Avant in onn: Nov manaschi per il hotel Scaletta
Avant in onn han ins annunzià che l'avegnir da l'hotel istoric «Scaletta» – ch'è dapi 12 onns vid – saja segirà. La societad Reka surpiglia il manaschi d'hotel e mainia quel durant almain 20 onns. La fundaziun Scaletta S-chanf e la Reka han decis da far in partenadi, sco quai ch'i ha num en ina communicaziun. Igl è il terz manaschi che la Reka ha en l'Engiadina, ils ulteriurs dus èn a Scuol ed a Madulain.
27 chombras, appartaments ed in restaurant
Per il «Scaletta» – ch'era oriundamain duas chasas da purs – èsi planisà 27 chombras, 8 appartaments, ed er in restaurant public cun radund 120 plazs. Tant la Reka sco era la fundaziun accentueschan da focussar sin aspects da la persistenza. L'hotel vegnia collià cun la rait da chalur da S-chanf, ed i duai dar ina construcziun cun materials locals. E per il persunal vulan ins duvrar sinergias cun las duas ulteriuras chasas da la Reka en Engiadina. Ins quinta cun radund 20 fin 30 novas plazzas da lavur, e radund 10'000 fin 12'000 pernottaziuns ad onn.
-
Bild 1 von 5. L'hotel sco el vesa ora uss. Bildquelle: REKA.
-
Bild 2 von 5. Visualisaziun da la situaziun suenter la sanaziun. Bildquelle: REKA.
-
Bild 3 von 5. Uschia duess la sala vesair or en l'avegnir. Bildquelle: REKA.
-
Bild 4 von 5. Ina da las chombras. Bildquelle: REKA.
-
Bild 5 von 5. Il cussegl da la fundaziun Scaletta. da sanester: Damian Pfister (vicedirectur Reka), Vic Jacob, Herbert Schmid (president da la fundaziun), Mengia Mathis, Roland Lymann, Riet Campell (osp), Niculin Arquint. Bildquelle: REKA.
Suenter la cumpra e la sanaziun duai l'hotel puspè vegnir avert sin la stagiun d'enviern il 2026/27, avevi num avant in onn. La lubientscha da construcziun è gia dapi il 2021 avant maun, uschia che las lavurs pon cumenzar la primavaira che vegn.
La fundaziun dovra anc daners
Il 2024 quintavan ins cun custs totals per la cumpra e la sanaziun da 14,7 milliuns francs. La Reka surpiglia ina summa «considerabla», sco ch'i ha num en la communicaziun. Plinavant vegn la fundaziun sustegnida dal chantun, da la Confederaziun e da divers fauturs e fauturas privatas. Cun ils daners possian ins fin l'atun 2024 cumprar l'immobiglia e cumenzar cun las lavurs da preparaziun. La fundaziun dovra dentant anc dapli daners – i manca anc radund ina mez milliun francs agen chapital. Il president da la fundaziun, Herbert Schmid, parta dentant dal fatg ch'ins possia anc rimnar quels. Ins saja il mument en ina intensiva fasa da fundraising ed en discurs cun diversas fundaziuns. Quai ha il president da la fundaziun ditg envers la Posta Ladina.