S-chanf prolunghescha sustegn per trenin «Spia svelta»

La vischnanca paja ina contribuziun annuala da 20’000 francs a la «AlpinTrans SA» che gestiunescha il trenin. Quel circulescha tranter la staziun da S-chanf e la Chamanna Varusch a l’entrada dal Parc Naziunal.

trenin mellan Bild in Lightbox öffnen.

Legenda da maletgs: Il trenin da la «AlpinTrans» circulescha da zercladur fin october cun giasts tras la cuntrada. mad

Dapi l’onn 2015 è il trenin «Spia svelta» en funcziun e circulescha tranter la staziun da S-chanf e la Chamanna Varusch a l’entrada dal Parc Naziunal Svizzer. Per ils emprims trais onns da gestiun avevan il chantun e la vischnanca da S-chanf garantì mintgin ina contribuziun annuala da 20’000 francs.

Nova fermada a Zuoz

A partir da la stad 2017 vegn la purschida schlargiada cun integrar er la vischnanca da Zuoz en l’urari. Sco ch’il cussegl communal da S-chanf scriva en ses protocol saja la frequentaziun da passagers augmentada fermamain durant ils ultims dus onns. Dentant n’è la gestiun betg anc rentabla.

Attracziun turistica

Siond ina purschida turistica che vegn nizzegiada fermamain, ha la suprastanza decis da sustegnair er vinavant il project. L’import vegnia integrà en il preventiv e dovria il consentiment da la radunanza communala. L’import vegnia diminuì dad onn ad onn, scriva il cussegl.

Agid da partenza

La vischnanca da Zuoz sa participescha er cun ina contribuziun annuala al project trenin «Spia Svelta». Tenor il president communal, Flurin Wieser, paja Zuoz quest onn in import da 15’000 francs. Il sustegn finanzial duai valair sco agid da partenza per il project.