Siglir tar il cuntegn

Header

video
S-chanf vul vender terren al figl dal president – e pir suenter enzonar quel
Or da Telesguard dals 10.11.2021.
abspielen. Laufzeit 3 minutas 23 Sekunden.
cuntegn

S-chanf Vendita da terren divida suprastanza e cumissiun da gestiun

Per engrondir l'hotel Veduta a Cinuos-chel dovri terren communal. Quel terren è per il mument anc en la zona agricula e da guaud. La suprastanza communala da S-chanf vul vender quest terren al figl dal president communal. La populaziun è s'exprimida per la vendita.

Survista da satelit
Legenda: Survista parcella a Cinuos-chel Armon Schlegel

Mesemna saira ha la radunanza communala da S-chanf decidì da vender terren da guaud al hotel Veduta per che quest possia realisar ses project d'engrondir il hotel. Il pretsch da vendita e cumpra: 9 francs pero m². La decisiun è stada clera cun 41 cunter 5 vuschs. Il resultat cler na munta però betg che tut saja stà cler.

Represchentant da cumissiun da gestiun banduna la sala

Cunquai ch'il terren è però en la zona agricula e da guaud, sto questa vegnir midada en zona da hotellaria per ch'il hotel possia vegnir engrondì. E gist pertutgant questa midada da zona hai dà chaus cotschens a S-chanf. Cunquai che questa midada da zona munta in augment da la valita dal terren, aveva la cumissiun da gestiun proponì in auter procedere. Per salvar quest augment da valita dal terren tar la vischnanca, ha lezza proponì da l'emprim midar zona, e silsuenter vender il terren al hotelier – notabene in terren che valiss lura dapli. La differenza è apparentamain stada uschè gronda ch'il represchentant da la cumissiun da gestiun ha bandunà la sala suenter la decisiun da la radunanza communala.

Vischnanca desista da d'augment da valur

Cun midar l'emprim la zona e pir suenter vender il terren per il pretsch adattà a la zona, avess la vischnanca fatg in gudogn da plirs 100'000 francs. Quai manegia era la professura Christine Seidler da la Scuol'auta spezialisada dal Grischun (FHGR). Tenor ella èsi pli usità en tals cas da midar l'emprim la zona e suenter vender. U da gnanc vender mabain da dar en dretg da construcziun la zona, per 66 u 99 onns.

La suprastanza argumentescha il procedere nunusità

La suprastanza communala argumentescha ch'ins na possia betg midar ina zona agricula e da guaud en ina zona per hotels, senza ch'ins avessia in project concret sin maisa. E quai na saja betg il cas. Quai haja manà a quest proceder nunusità, ha ditg la suprastanza vers RTR. In segund argument saja ch'ins saja sa cunvegnì cun l'hotlier dad era midar la zona, nua che ses hotel saja. Questa però da zona da bajegiar regulara en ina zona per hotels. Quai gidia lura però la vischnanca che sto sminuir la zona da bajegiar sin terren communal – quai sin basa da la lescha da planisaziun dal territori revedida.

Midadas da zona en ina da las proximas radunanzas

Las midadas da zona seguan pli tard en ina futura radunanza communala. Là ha la populaziun da S-chanf da decider davart la midada da zona dal terren vendì dad ussa zona agricula e da guaud en ina zona per hotels, ed era da midar la zona, nua ch'il hotel sa chatta dad ina zona da bajegiar en ina zona per hotels. Pir lura pudess l'hotel Veduta vegnir engrondì.

RTR Telesguard 17:40

Artitgels legids il pli savens

Scrollar a sanestra Scrollar a dretga