Siglir tar il cuntegn

Engiadina Safety first – ina saiv è necessaria

Ina saiv electronica cun radar ed infracotschen – quai fiss stada la soluziun ideala enturn la plazza aviatica a Samedan. Tests l'enviern passà han mussà, che quest model da saiv na funcziuna betg. Il grond problem è la selvaschina. Quella traversa adina puspè la pista e quai è fitg privlus.

Legende: Video La saiv è fixa abspielen. Laufzeit 03:37 Minuten.
Or da Actualitad video dals 15.05.2018.

La plazza aviatica a Samedan è fin qua l'unica en Svizra, che n'ha nagina saiv enturn la pista. Quai sa duess midar. Planisada è ina saiv enturn la plazza aviatica en emprima lingia per impedir traversadas da la selvaschina.

Privel acut

L'enviern passà, cun fermas navaglias è stà in grond problem per ils responsabels da la plazza aviatica. Tschiervs ma era passlunghists han traversà o han vulì traversar pliras giadas la pista. Quel fatg è problematic e pudess chaschunar accidents grevs.

Tests spezials

Durant l'enviern passà han ils responsabels fatg differents tests cun ina saiv electronica, che funcziuna cun radar ed infracotschen. Quels tests han mussà, che persunas ed animals da chasa san respectar quella - la selvaschina restia però il problem principal. Perquai sa han decis ils responsabels per ina saiv fixa da var dus meters fin trais meters e mez autezza.

Gia finanzià

La INFRA da la plazza aviatica di, che 3/4 da l'import da quella saiv vegnian finanziads da la Confederaziun. Ils responsabels avevan inoltrà ina dumonda da sustegn e quella saja vegnida acceptada, uschia Christian Meuli, il president da la INFRA. 2,1 milliuns francs vegnan perquai surpigliads. A la populaziun restan circa 700'000 fin 800'000 francs. Quels daners ha la populaziun d'Engiadin'Ota però gia deliberà il mars dal 2017 cun il credit da 22 milliuns francs ed il cler gea da 80% a la plazza aviatica.

RR actualitad 17:00