En in studi han scienziads da l'Institut federal per la perscrutaziun da guaud, naiv e cuntrada (WSL) examinà durant 5 onns en il Parc Naziunal Svizzer, quant impurtants che animals pitschens èn per l'ecosistem da prads. Sco ils scienziads scrivan en la revista spezialisada «Nature Communications», han els observà che animals che mangian verd giogan ina rolla impurtanta en l'ecosistem dal prà. Ils pitschens èn dentant pli impurtants ch'ils gronds.
Ecosistem funcziuna er senza animals gronds
Senza ils animals pli gronds che maglian erva funcziunescha l'ecosistem er vinavant – e quai betg mender, dentant auter. Sche nagins tschiervs na maglian pli sin il prà, lura èn las plantas che creschan svelt en l'avantatg. Per consequenza sa mida lura la diversitad da las plantas.
Senza ils pitschens animals senza spina (invertebrads) – da lindornas fin a salips e plugls da feglia – vegn l'ecosistem da prads dentant svelt en difficultads. L'ecositem daventa instabil e na po betg pli sa datar a cundiziuns da l'ambient variablas.
RR novitads 15:00