La missiun dals musicists è clera: stgatschar la lungurella dals abitants e mussar solidaritad envers la Chasa per attempads e da tgira a Samedan. Ils cussadents pon giudair sin distanza la musica ed emblidar lur isolaziun causa il coronavirus.
Musica encunter la solitariadad e lungurella
Las 85 abitantas ed abitants da la Chasa d’attempads e da tgira Promulins a Samedan passentan cun la crisa da corona in grev temp.
Naginas visitas, quasi nagin contact cun il mund dador las quatter paraids. L’isolaziun è fitg difficila da supportar. Musicistas e musicists da l’Engiadin’Ota vulan levgiar quella situaziun – trategnair ils abitants e las abitantas, striunar in rir sin ils lefs e svegliar ils tacts musicals en lur cors.
Chantar e sa regurdar
Il Trio Giarsun da Puntraschigna cun Chasper Valentin, Urs Camozzi e Patrick Würms – han laschà reviver regurdanzas da pli baud tar lur auditurs chantond e faschond musica cun ghitarra, orgla da maun, clarinetta e giun.
Concert en curtin – daventà in hit
Cumenzà aveva tut cun dus sunatibas. Els sajan vegnids en curtin per in pitschen concert, simplamain per trategnair ils abitants, sa regorda la manadra da la Chasa d’attempads Promulins, Marion Barandun. Sin quai ha ella lantschà ils 3 d'avrigl in appel via las medias socialas, per dumandar, tgi ch’avess interess da vegnir a sunar qua e là en curtin.
Gronda solidaritad
Il resun saja stà impressiunant, uschia Barandun.
Jau sun intgantada da las numerusas musicistas e musicists ch'èn s'annunziads e tuts èn er pronts da vegnir ina segunda giada
Insumma èn ils responsabels da la chasa d’attempads e da tgira intgantads da la gronda solidaritad che vegn mussada envers lur chasa durant quest grev temp per collavuraturs e cussadents. Gugent vuless Marion Barandun sche pussibel cuntinuar cun intermezzos da trategniment er en avegnir.