Siglir tar il cuntegn

Header

audio
L'exposiziun da fotografias da l'anteriur magister da geografia Peter Frehner
Or da Actualitad dals 24.11.2023. Maletg: RTR
laschar ir. Durada: 3 minutas 12 Secundas.
cuntegn

Samedan Geografia vivida en la pratica

Peter Frehner è stà durant quatter decennis magister da geografia al Lyceum Alpinum a Zuoz. Sper l’instruir la teoria il saja gia adina stà a cor er la pratica. Uschia ha l’um che abitescha a S-chanf organisà durant quel temp numerus viadis cun scolaras e scolars en il Canada u er faschond en tut 15 projects umanitars en la Rumenia cun il «Corps of Volunteers».

 Adina cun sai en sia valisch è sta l’apparat da fotografar. L’emprim en furma analoga, pli tard sco camera digitala. Durant ils numerus inscunters cun la populaziun da las differentas terras, è adina puspè reussì a Peter Frehner da tschiffar mument spezials cun ses apparat da fotografar.

200 fotografias en l’exposiziun

Ina selecziun da quellas nundumbraivlas fotografias ch’el ha fatg ils ultims 40 onns, expona Peter Frehner uss en la Porta Samedan, il bajetg nua ch’er la Migros è dachasa. En occasiun da la vernissascha dals 25 da november 2023 vul Peter Frehner er porscher ina pussaivladad a tut ses anteriurs scolars e scolaras da sa vesair puspè ina giada.

Cuntradas, animals e persunas

Ils motivs da las fotografias en colur ed er en alv e nair èn savens maletgs dad animals, ma er da cuntradas, atmosferas ch’il magister da geografia ha recepì viagiond cun sia camera. Ils maletgs èn exponids vid las paraids lung las stgalas ed ils tarpuns rullants en la Porta Alpina fin la stad 2024. La vernissascha è ils 25 da november 2023 a partir da las 18:00.  

 

RTR actualitad 06:00

Artitgels legids il pli savens