La Scola professiunala superiura da turissem dal Grischun e l’Armada svizra han suttascrit ina cunvegna da cooperaziun. Ils moduls da scolaziun absolvids durant la scolaziun militara na ston las studentas ed ils students betg pli absolver, sch’els sa decidan da frequentar pli tard la Scola professiunala superiura da turissem dal Grischun.
Communicaziun da crisa, tecnica da preschentaziun, psicologia, management persunal – quests ed auters moduls che l’Armada svizra porscha durant la scolaziun per daventar sutuffiziers u uffiziers na ston betg pli frequentar ils giuvens e las giuvnas che vulan pli tard far la Scola professiunala da turissem a l’Academia Engiadina a Samedan. La finamira da questa collavuraziun è da far attractiva l’Armada svizra per ina carriera militara. Ultra da quai vegnan els sustegnids finanzialmain dal stadi cun ina contribuziun da 3'500 francs per sutuffiziers e fin 10'000 francs per uffiziers.
