La vischnanca da Samedan ha d’investir 4.3 milliuns francs en la sanaziun da las installaziun existentas. La funtauna Val Champagna è numnadamain la pitga principala dal provediment d’aua per la vischnanca che dovra en media 3,9 milliuns liters il di.
Ils custs en survista
Mesiras provediment Val Champagna | cust incl. TSP |
Provisori per sviar funtauna | 60'000 |
Lavurs da sbuvada | 120'000 |
Construcziun nov chanal da funtauna | 700'000 |
Reservuar provisoric | 30'000 |
Sbuvada e lavur da fundament nov reservuar | 100'000 |
Nov reservuar incl. pre-batschigl | 570'000 |
Attatg reservuar | 70'000 |
Fundament per edifizi da filtraziun | 190'000 |
Nov edifizi da filtraziun | 1'420'000 |
Equipament electro-mecanica | 860'000 |
Installaziun electro-mecanica | 180'000 |
Project cumplet per sanaziun provediment d'aua Val Champagna | 4'300'000 |
Sanaziun urgenta
L’incassament e la chombra d’aua sa preschentan anc adina en lur construcziun dals emprims temps ed han uss da vegnir sanads urgentamain, ha declerà il president communal, Jon Fadri Huder.
Prescripziuns pli severas
Per consequenza da las limitas pli restrictivas per elements geo-gens en concentraziun minimala che l’Uffizi federal da sanadad publica ha dispost per l’aua da baiver, sto la vischnanca prender ultra da quai er mesiras per tegnair en las valurs maximalas.
Puspè «up to date»
Cun la construcziun d’in nov incassament d’aua, ina nova chombra d’aua e cun l’installaziun d’implant da filtraziun vegn il provediment d’aua Val Champagna modernisà cumplettamain ed uschia er adattà a las prescripziuns actualas.
En ina consultaziun preliminara tracta la radunanza communala dals 12 da fanadur la dumonda da credit per il project. Sur da quel ha il suveran da Samedan da decider a l’urna ils 23 da settember 2018.
RR actualitad 17:00