Il president da la «Skilift Survih Samedan SA» Martin Merz di ch'i dovra temp pre remplazzar il motor rut - pli precis almain 6 emnas. Cun quai han ins decis da metter giu il runal Survih gist sur la vischnanca da Samedan per il rest da la stagiun.
Mintga runal è fabritgà auter. Perquai dovri temp per fabritgar il motor e reparar il donn.
Però na consista il pitschen territori da skis betg be dal runal Survih. I dat in tarpun che porta ils uffants in pèr meters si per la costa. Ed era per quels che fan part da la scola da skis datti in curt runal d’exercizi. Tuts dus restan averts per il rest da la stagiun d’enviern.
Runal Survih ha 16 onns
Cunquai ch'il runal è vegnì fabritgà il 2010 e las circumstanzas èn sa midadas dapi lura, n'èsi betg be da midar il motor.
Dapi il temp da fabrica dal runal èn sa midadas era las prescripziuns. E quellas han ins da metter enturn cun far midaments e reparaturas vi dal runal.
Quai duai capitar la proxima stad, di il president da la societad purtadra. Uschè duai il runal Survih esser pront per la proxima stagiun d'enviern.
Restituziun da 50% dals raps da l’abunament
Per quellas persunas che han cumprà in abunament dat la Skilift Survih Samedan SA la pussaivladad da restituir la mesadad dals custs. Las persunas han da s’annunziar per e-mail a info@skilift-survih.ch.