Sin l'Alp Prüma en la Val Roseg duai dar in edifizi nov per remplazzar l'edifizi existent. La radunanza communala da Samedan ha approvà il credit correspundent da 972'000 francs. En emprima lingia vulan ins avair in alloschi modern per il persunal da l'Alp Prüma, ha communitgà la vischnanca da Samedan.
Er approvà han ins in credit da 275'000 francs per far ina concurrenza d'architectura. Sin l'areal da la vischnanca a Cristansains duai dar abitaziuns per indigens. Ils Samedrins han er approvà il preventiv 2024. Ins quinta cun in surpli d'expensas da radund 3,1 milliuns francs – quai tar investiziuns bruttas da 5,1 milliuns francs.
Il pe da taglia resta sco fin uss tar 85% da la taglia chantunala simpla. La radunanza ha er approvà ina garanzia da 315'906 francs per l'Academia Engiadina per ils proxims tschintg onns. Uschia na sto la scola betg avair reservas da 723'000 francs tenor lescha chantunala. Era las vischnancas San Murezzan, Puntraschigna e Schlarigna dattan garanzias.