La finamira è da persvader ed intgantar en Engiadina uschè blers sco pussibel per il sport da Disc Golf. Ils organisaturs dal club Disc Golf Engiadina installeschan perquai in parcours temporar cun 18 chavognas si Muntarütsch sur Samedan. Lur speranza è da pudair realisar pli tard perfin in parcours fix.
Sport per mintgin
Disc Golf è in gieu da sport en il liber. La scena en Svizra è naschida ils onns 80. Nov datti er en Engiadina ina societad. Tar il sport da Disc Golf han ins da tutgar cun in frisbee la chavogna fixada vid stangas u er plantas, cun uschè paucas bittadas sco pussibel. Per il gieu vegnan duvrads frisbees ch’èn pli pesants che normals e ch'han er ina furma pli erodinamica.