Dapi diesch onns porscha l’Academia Engiadina a Samedan la scola media spezialisada ch’è drizzada or sin ils secturs da sanadad e pedagogia. L’interess tar giuvnas e giuvens è però mediocher. Sur ils trais onns scolastics quinta la scola actualmain 14 scolaras e scolars. Per cuvrir ils custs duvrass ella almain 38 scolaras e scolars, uschia Sigi Asprion, il CEO da l'Academia Engiadina.
Purschida unica
Per gulivar ils custs han ils responsabels da la scola inoltrà gia duas giadas ina dumonda da sustegn tar il chantun. Quel haja però refusà las dumondas renviond a la lescha da scolas medias. Uss va ina dumonda da sustegn da var 350’000 fin 400’000 francs l’onn a la regiun Malögia.
Nus vulain mantegnair questa offerta en nossa regiun e jau speresch ch'er las vischnancas hajan chapientscha. Questa scolaziun è in enritgiment per la regiun.
La scola media spezialisada a Samedan è l’unica da quel gener en il Grischun dal Sid. Las proximas sa chattan a Schiers e Cuira. Sche las 11 vischnancas da la regiun Malögia refusan la dumonda da sustegn, saja la scola en privel da serrar sias portas.