Avant 10 onns quintava la scola professiunala a Samedan var 300 scolaras e scolars. Oz èn quai anc 167. Tenor Gian Carlo Simonelli, il mainascola, ina situaziun pauc legraivla e fitg difficila. Ils motivs èn tranter auter il svilup demografic e gist ils ultims onns er la pandemia da corona. Tras quella eran emprendissadis da prova numnadamain rars. Ed er il trend actual da las scolas medias badia la scola professiunala a Samedan, uschia Gian Carlo Simonelli.
Prescripziuns dal chantun fan fastidi
Tras las paucas emprendistas ed emprendists saja adina pli difficil da metter ensemen classas che correspundan a las prescripziuns dal chantun. Sche quellas èn memia pitschnas vegnan las professiuns pertutgadas transferidas a Cuira. Ils ultims quatter onns ha la scola en Engiadin’Ota pers tschintg professiuns.
Sch’il dumber da scolaras e scolars è uschè pitschen che nus avain custs memia auts, èsi a fin cun porscher spiertas da maniera decentrala.
Optimar uraris d’instrucziun
La sfida per meglierar la situaziun da la scola professiunala è tenor Gian Carlo Simonelli gronda. Impurtant saja d’optimar ils plans d’instrucziuns, uschia che las professiuns existentas possian vegnir mantegnidas. La scola sco tala na saja betg periclitada, quai demussia il fatg che la regenza ha decis plirs credits – tranter auter per sanar la chasa da scola.
Or da l'archiv
