Siglir tar il cuntegn

Header

audio
L'ingiant da la butia Hermelindis
Or da Actualitad dals 23.06.2023. Maletg: RTR
laschar ir. Durada: 3 minutas 35 Secundas.
cuntegn

Samignun Discharmonia, polizia ed in ingiant

A Samignun è vegnida ingiantada l’anteriura butia Hermelindis, ch'ha stuì serrar sias portas l’onn 2017. L’offerta minimala sin l’object è stada fixada sin 5 milliuns francs svizzers. Responsabels per l’ingiant è stà l’Uffizi da scussiun e concurs da l’Engiadina Bassa/Val Müstair.

L’ingiant ha gì lieu en la chasa communala da Samignun. Da la partida èn stads tuts trais fragliuns possessurs. Era la Polizia chantunala è stada preschenta. Quai or da motivs da segirezza, sco igl ha gì num.

Duas soras ed in frar, n’èn betg vegnids perina co spartir l'immobiglia. Vul dir, la chasa d’affar cun restaurant e duas parcellas en vischinanza. Ina sora posseda la mesadad, in’autra in quart ed il frar posseda il quart che vanza.

Il motiv pertge ch'els n’èn betg sa cunvegnids n'è betg enconuschent. Enconuschent è dentant, che quai cas è ì avant la Dretgira regiunala sco era avant Dretgira chantunala. En in emprim pass ins haja proponì da far in ingiant intern tranter ils trais fargliuns, ma quai n'ha betg funcziunà.

La butia Hermelindis a Samignun
Legenda: La butia Hermelindis a Samignun RTR

Chasa ingiantada per tschintg milliuns francs

Il pretsch da partenza è vegnì stimà da la Dretgira regiunala sin tschintg milliuns francs. Vul dir, la chasa d’affar e per las parcellas en vischinanza mintgamai 112’00 francs.

La chasa d’affar è la fin finala vegnida ingiantada per exact tschintg milliuns francs. Las parcellas per 445'000 e 300'000 francs. Cumpradra è stada la sora che ha manà quest affar passa trais decennis, plinavant ha cumprà in nev dad ella ina da las duas parcellas.

RTR actualitad 17:00

Artitgels legids il pli savens